NH 302 siamtu, BRN Infrastructure Pvt. Ltd. leh kawng enkawltu NHIDCL-te chuan kuminah fur a thleng dawn tih a hma daihin hre lawk mah se, Tlabung leh a chhehvel mipuite'n harsatna an tawh lohna tura inhmakhua lawk an tum lo, niin Tlabung ṭhalaite chuan an sawi a, kawng chungchang ngaihvena hmalatute hmaah hun rei lo te chhunga an harsatna sutkian intiam ziah mah se, a taka bawhzuina engmah a awm tak tak ngai lo niin an sawi. 

Tlabung ṭhalaite chuan NH 302 chu siam mek a nih avangin duhthusamin a ṭha thei lo tih an pawm tih an sawi a; nimahsela ruahtui a tlak vanga lirthei zawh theih loh khawpa a chhe leh ta mai te, an siam zawh tawh pawh ruahtui tlem te vanga diak kawi leh vek thei khawpa a tlo lo te, lei pahnih an thawmṭhat theih loh vanga harsatna lian tak an tawk mek te chu an rilru tinatu a nih thu an sawi.

Vawiina lungawi lohna lantirtu Tlabung ṭhalaite hian Lunglei Lunglawn venga NHIDCL office kawtah leh Tlabung péng hmun lunlaiah kawng chhe lanna banner, lian taka an print tir chu an tar a, banner siamna senso hi Tlabung Village Council-ten an tum a ni.